sukalpakhabar
काठमाडौं । परराष्ट्रमन्त्री शिशिर खनाल चारदिने औपचारिक भ्रमणका लागि आज चीन प्रस्थान गर्दै छन्। परराष्ट्र मन्त्रालयले शुक्रबार विज्ञप्ति जारी गर्दै मन्त्री खनालको चीन भ्रमणबारे औपचारिक जानकारी दिएको हो।
मन्त्रालयका अनुसार चीनको कम्युनिस्ट पार्टीको केन्द्रीय समितिको राजनीतिक ब्यूरोका सदस्य तथा चिनियाँ विदेशमन्त्री वाङ यीको निमन्त्रणामा परराष्ट्रमन्त्री खनालले जेठ ३१ गतेदेखि असार ३ गतेसम्म चीनको औपचारिक भ्रमण गर्नेछन्।
भ्रमणका क्रममा बेइजिङमा मन्त्री खनाल र चिनियाँ विदेशमन्त्री वाङ यीबीच द्विपक्षीय वार्ता हुने कार्यक्रम रहेको छ। साथै, उनले चीनका उच्चस्तरीय सरकारी अधिकारी तथा विशिष्ट व्यक्तिहरूसँग शिष्टाचार भेटवार्ता गर्नेछन्।
मन्त्री खनालले बेइजिङस्थित नेपाली दूतावासद्वारा आयोजित लगानी सम्मेलनमा पनि सहभागिता जनाउनेछन्। सम्मेलनमा उनले नेपालमा विदेशी लगानी प्रवर्द्धनका सम्भावनाबारे चिनियाँ व्यापारिक समुदायसँग अन्तरक्रिया गर्ने कार्यक्रम तय गरिएको छ।
यसैगरी, बेइजिङस्थित नेपाली दूतावासले आयोजना गर्ने स्वागत कार्यक्रममा सहभागी भई उनले त्यहाँ रहेका नेपाली समुदायसँग समेत भेटघाट तथा संवाद गर्नेछन्।
औपचारिक भ्रमण सम्पन्न गरी परराष्ट्रमन्त्री खनाल असार ३ गते काठमाडौं फर्कने कार्यक्रम रहेको परराष्ट्र मन्त्रालयले जनाएको छ।
sukalpakhabar
प्रतिक्रिया