ओपीडी सेवा नखुम्च्याउन पूर्वमन्त्री प्रदीप पौडेलको आग्रह

काठमाडौं । प्रदीप पौडेल ले सरकारी अस्पतालहरूमा ओपीडी सेवा नखुम्च्याउन र बिरामीलाई हुने सास्ती हटाउन सरकारसँग आग्रह गरेका छन्।

बिहीबार सामाजिक सञ्जालमार्फत धारणा सार्वजनिक गर्दै पूर्वस्वास्थ्यमन्त्रीसमेत रहेका पौडेलले पछिल्लो समय सार्वजनिक बिदाको समयमा सरकारी अस्पतालमा ओपीडी सेवा बन्द हुँदा बिरामीहरू समस्यामा पर्ने गरेका उल्लेख गरेका छन्।

उनले ‘सरकारीमा मात्र रोकिएको ओपीडी सेवाले सर्वसुलभ र सहज हुनुपर्ने स्वास्थ्य सेवाको पहुँच खुम्च्याएको छ भने बिरामीमाथि आर्थिक बोझ थपिएको छ’ भन्दै चिन्ता व्यक्त गरेका छन्।

पौडेलका अनुसार सरकारी अस्पताल तथा स्वास्थ्य संस्थामार्फत आमनागरिकलाई सहज र सरल रूपमा गुणस्तरीय सेवा उपलब्ध गराउनुपर्नेमा जोड दिँदै निजी क्षेत्रसँग समन्वय गर्दै समग्र स्वास्थ्य प्रणालीलाई नागरिकमैत्री बनाउन आवश्यक रहेको बताएका छन्।

नेपाली कांग्रेस का महामन्त्रीसमेत रहेका उनले स्वास्थ्य जस्तो संवेदनशील क्षेत्रमा सेवा सीमित गर्ने होइन, अझ विस्तार गर्ने नीति आवश्यक रहेको उल्लेख गरेका छन्।

साथै, उनले आफू स्वास्थ्य तथा जनसंख्या मन्त्रालय मा रहँदा गरेका चार प्रमुख कामहरू पनि स्मरण गराएका छन्, यद्यपि ती कामहरूको विस्तृत विवरण भने खुलाइएको छैन।

उनले लेखेका छन् :

१) अतिरिक्त समय काम गर्ने चिकित्सक तथा स्वास्थ्यकर्मीलाई प्रोत्साहन दिएर सार्वजनिक बिदाका दिनमा समेत निरन्तर सेवा उपलब्ध गराउने प्रक्रिया अघि बढाएका थियौँ।

२) सरकारी अस्पतालहरूमा हुने सेवाग्राहीको चापलाई ध्यानमा राखेर ओपिडी सेवालाई दुई सिफ्टमा सञ्चालन गर्ने र Extended Health Service मार्फत सेवाको समय बढाउने जस्ता अन्य थुप्रै सुधारका कामहरू सुरुवात गरेका थियौँ।

३) स्वास्थ्य सेवा विशिष्ट सेवा भएकोले चिकित्सक तथा स्वास्थ्यकर्मीहरूका लागि थप प्रोत्साहन भत्ता (Incentive) दिन अध्ययन प्रतिवेदन तयार गरी त्यसको कार्यान्वयन सुरु गरेका थियौँ।

४) अस्पतालहरूमा चिकित्सक तथा स्वास्थ्यकर्मीको अभाव पूर्ति गर्न पहिलो चरणमा २५०० नयाँ जनशक्ति थप गर्ने प्रक्रियालाई अन्तिम चरणमा पुर्‍याएका थियौँ।